ខេត្តព្រះសីហនុ៖ មនុស្សចំនួន ៨នាក់ត្រូវបានឃាត់ខ្លួនបន្ទាប់ពីសមត្ថកិច្ចចុះបង្ក្រាបទីតាំងជល់មាន់មួយកន្លែងស្ថិតនៅចំណុចក្នុងព្រៃ ក្បែរភ្នំ៩៦ ស្ថិតនៅភូមិ៥ សង្កាត់លេខ៤ ក្រុង-ខេត្តព្រះសីហនុ កាលពីថ្ងៃទី១៨ ខែមីនា ម្សិលមិញ។
ក្នុងការចុះបង្រាបអ្នកលេងល្បែងជល់មាន់នេះសមត្ថកិច្ចក៏ដកហូតបានម៉ូតូចំនួន ៧គ្រឿង ម៉ូតូ PassApp ២គ្រឿង កង់ ១គ្រឿង និងមាន់ជល់ចំនួន ៣ក្បាលផងដែរ។
ក្រោយពីធ្វើការសាកសួរ ជនសង្ស័យទាំង ៨នាក់ ពិតជាបានទៅសង្វៀនក្នុងព្រៃម្តុំភ្នំ៩៦ សង្កាត់លេខ៤ ដើម្បីទៅរកលេងល្បែងស៊ីសងជល់មាន់ប្រាកដមែន។
បច្ចុប្បន្នជនសង្ស័យទាំង ៨នាក់ខាងលើកំពុងឃាត់ខ្លួននៅអធិការដ្ឋាននគរបាលក្រុងព្រះសីហនុ ដើម្បីធ្វើការសាកសួរ និងរង់ចាំចាត់ការតាមនីតិវិធីបន្ត៕
